Лукаревска веќе не е директорка на УЈП, ќе биде пратеник

0
114

По верификувањето на мандатот за пратеник, Сања Лукаревска ја напушти функцијата директор на Упрвата за јавни приходи, а на нејзино место за в.д. директор е поставен Фарук Омери, кој пред назначувањето бил помошник-директор во Упрвата, информираат од УЈП за „Макфакс“.

Лукаревска вели дека засега останува на функцијата пратеник, а дали ќе биде именувана на друга функција доколку СДСМ состави нова влада, ќе одлучува премиерот.

„Како ќе одлучи премиерот Зоран Заев со формирањето на новата влада, така ќе биде. Поради законското ограничување, во моментот не можам повеќе да бидам избран функционер од Владата затоа што сум пратеник во Собранието“, изјави кусо Лукаревска.

На оваа функција Лукаревска беше 3 години и за време на нејзиното директорување се спроведува еден од најголемите проекти што ги најави СДСМ на претходните избори – „Мој данок – мој ДДВ“ преку кој граѓаните со скренирање на фискалните сметки си го остваруваат правото на поврат на парите од данокот.

Таа беше носител на листата во Втората изборна единица од коалицијата „Можеме“ предводена од СДСМ, која освои најмногу пратенички мандати на изборите на 15 јули, а на 4 август ѝ беше верификуван мандатот за пратеник во новиот собраниски состав.

Освен Лукаревска, и други функционери од редовите на СДСМ ги напуштија функциите. Така, на директорското место на Мартин Костовски од „Службен весник“ е назначена Татјана Лалчевска. Кога станаа пратеници, функциите ги напуштија и Дарко Каевски, кој беше директор на Агенција за млади и спорт, Фаница Николовска од Државниот управен инспекторат и Боби Мојсоски од Казнено-поравната установа „Идризово“.