Во Австрија најавен нормален почеток на учебната година, со помош на „корона-семафор“

0
75

Австрискиот министер за образование Хајнц Фасман најави нормален почеток на учебната година, без поделба на одделенијата во помали групи и настава во смени, со следење на „корона-семафорот“.

Фасман на прес-конференцијата објасни дека настава од дома ќе се воведе само во случај на регионално зголемување на бројот на заразени, односно кога „корона-семафорот“, кој го воведе австриската влада за следење на состојбите во секоја општина, е во „црвена“ боја, пренесува „Танјуг“.

За студентите со средно образование на возраст од четиринаесет години, учењето од далечина може да се примени кога семафорот ќе биде „портокалов“.

„Корона-семафорот“ во моментов е во експериментална примена, а беше најавено дека нормалната примена ќе почне на почетокот на септември, па сè уште не е јасно како ќе изгледаат неговите последици за училиштата.

Фасман рече дека е неопходно да се добијат јасни дефиниции за тоа откога се менуваат боите на „семафорот“.

„Од есен, сакам нормална работа за училиштата“, објасни тој, додавајќи дека тоа значи без смени и нема поделба на одделенијата во помали групи.

Тој рече дека ќе се избегне целосно затворање на училиштата.

Доколку „корона-семафорот“ е на црвено светло, тоа би значело целосно затворање на една општина, а тоа би значело и затворање на училиштата на таа територија, односно учење од дома.

Што се однесува до спортските активности, тие ќе се одржуваат само на отворено и без контактни спортови.

На секои три недели, како што најави Фасман, ќе бидат тестирани околу 15.000 ученици и 1.200 наставници во 250 училишта низ Австрија, со цел да се следи состојбата.